Hans is op 5 Julie 1706 met Helena du Toit getroud. Helena was 'n dogter uit die
eerste Du Toits wat in die Kaap aangekom het; haar vader, Guillaume du Toit en
sy vrou Sara, gebore Cochet (of Couchet), van die plaas Aan 't Pad naby
Stellenbosch, het net dogters gehad, naamlik Helena, Geertruy en Susanna
(Kannemeyer 1940:88; De Villiers 1981:991; sien ook Aantekeninge,
paragraaf 6).
Helena du Toit is, volgens Adam Tas se dagboek op 23 Julie 1690 gebore en op 6
Augustus 1690 gedoop, en was dus nog nie sestien jaar oud toe sy met Hans
Oberholster getroud is nie (Fouché 1970:55; 85). Helena is in 1713 op 23-jarige
ouderdom oorlede (haar dogter Johanna Barbara is op 18 Junie 1713 gedoop en
Jan het in Januarie 1714 weer in die huwelik getree).
Judith du Plessis
(Sien Aantekeninge, paragraaf 7)
Na Helena se dood is Hans op 14 Januarie 1714 met Judith du Plessis, weduwee van
Arie (ook Arij of Ary) van Eeden, getroud. Judith du Plessis was 'n dogter van die
chirurgijn Jean Prieur du Plessis (1638-1708) van Poitiers, Frankryk, wat in 1688 in
die Kaap aangekom het. Du Plessis se tweede vrou, Marie Buisset (Judith se
stiefmoeder), was 'n erkende vroedvrou van wie in verskeie geskrifte melding
gemaak word (Botha 1962:182-183; sien Aantekeninge, paragraaf 8).
Hans se testament gee Judith se ouderdom in 1718 as 24 jaar aan, wat met haar
doopdatum (1694) strook. Volgens Coetzee (1988:338) is sy gedurende 1694 in
Ierland gebore. Geen kinders is uit Hans en Judith se huwelik gebore nie. Judith is
ná Hans Oberholster se dood met Claas van Donselaar in 1724 getroud (Voetnota Resolusies 1720-1723:345).
